Ad-adda ti panangparegta iti Baguio City iti kampanya daytoy tapno agbalin kas smoke-free a siudad.
Iti panakiuman iti Bombo Radyo kenni Dra. Celia Flor Brillantes, dadaulo iti City Health Services Office-Baguio, nainget ita iti panakikoordinarda kadagiti babbarangay, youth leaders, ken kadagiti sellers tapno agbalin dagitoy nga health accountable kadagiti agtutubo a kangrunaan a maguyguyugoy kadagiti vape.
Iti datos nga imbinglay ni Dra. Brillantes, rimwar iti naisayangkat a Tobacco Survey idi 2022 a 13% kadagiti young adults ti agsigsigarilyo, nababbaba ngem iti 35% idi 2014.
Nupay kasta, naobserbaran met a ngimmato ti bilang dagiti vape users iti siudad nangruna dagiti young adults wenno agtutubo.
Gapu iti dayta, inaklon ni Dra. Brillantes a kasapulanda a paregtaen ti programa dagitoy tapno masurwan ken maipakaawat kadagiti agsigsigarilyo ken agve-vape ti risgu a maipaay dagitoy a bisyo iti salun-atda.
Innayon ti opisyal a ti maysa a vape ket katukad iti dua ket kagudua a pakete iti regular a sigarilyo rason a nainget ti panangdiscourageda kadagiti agar-aramat iti daytoy.
Immunan nga imbinglay ni Dra. Brillantes a ti vape ket agserbi laeng koma nga alternatibo tapno in-inot a maikkat ti panagsigarilyo ngem agparparang a daytoyen ti simmukat a kangrunaan a maar-aramid.
Gapu iti dayta, impettengna a ti panangliklik wenno in-inot a saan a panagaramat kadagitoy ket maysa a community effort nu sadino, kasapulan ti suporta dagiti pamilya, pagadalan ken ti barangay.//Bombo Rob Dominguez
