BAGUIO CITY- Pagdandanagan dagiti sumagmamano a Taxi Driver iti siudad ti Baguio ti posible a panagngato ti presio dagiti petrolyo.
Iti interview ti Bombo Radyo kenni Romeo Vicente,Taxi Driver iti siudad, kinunana a bumaba ti pamasrekan dagitoy iti kanito a ngumato dagiti presio ti nasao a produkto.
Malaksid iti dayta, kinuna ni Vicente a saan nga umdas ti agdama a P50 a flag rate dagitoy no ngumato dagiti petrolyo nangruna ita a saanda nga agnum-numar iti fuel subsidy.
Sigun kenkuana, dagiti operator ti agnum-numar iti nasao a subsidiya agsipudta dagitoy ti nakanaganan kadagiti lugan.
Kabayatanna, saan a pabor dagitoy iti 20 angingga 30 Kilometer per hour nga speed limit iti siudad.
Maibasar iti obserbasion ni Vicente, nabuntog ti nasao nga speed limit ken mangintunda iti trapiko.
Maipalagip nga immuna a kinuna ni Assistant Director Rodela Romero, DOE Oil Industry Management Bureau Director III nga agipektibo intun June 24, 2025 ti panagngato ti petrolyo.
Sigun kadagiti nagduduma a kompanya ti lana, posible a ngumato ti Gasolina iti P2.50 agingga P3 tunggal litro; Diesel a posible a ngumato iti P4.30 agingga P4.80 tunggal litro ken ti Kerosina a posible a ngumato iti P4.25 aginga P4.40 tunggal litro.
