ISRAEL- Inyunay-unay ni Olive Alvarez, Overseas Filipino Workers sadiay Israel a natalged dagitoy iti baet ti mapaspasamak a giera iti nagbaetan ti Israel ken Iran.
Iti pannakiuman ti Bombo Raydo kenkuana, kinunana a dagus a mapakaamuandda dagitoy babaen iti alarm ti Cellphone da iti kanito nga adda ti Bomba a maipatulod sadiay Israel.
Gapu iti dayta, maipaayanda iti gundaway nga agturong kadagiti Bomb Shelter a kaaduan a masarakan iti unneg ti pagtaengan sadiay.
Iti agdama, sumagmamano ti mangmang-ngeganda a Bomba kasta met ti alarm manipud iti Cellphone dagitoy.
Malaksid iti dayta, regular metten ti agdama a panagbiag idiay Israel ngem nainget a maipawil ti panaggu-ummong dagiti tattao.
Kabayatanna, kinuna ni Alvarez a boluntaryo ti repatriation kadagiti Pilipino sadiay, nangruna ita nga awan paylaeng ti naawatda a pammilin ti Embahada ti Pilipinas seknan iti mandatory repatriation.
Mainiag iti dayta, kidkiddawen metlaeng ni Alvarez a liklikan ti panagiwaras iti palso a damag nga ad-adda a mangpakaro iti panagdanag ti publiko. //mp4
