Ad-adalen ti Development Budget Coordination Committee (DBCC) ti P6.793 trillion a national budget para iti fiscal year (FY) 2026.
Daytoy ket katukad ti 22.0% ti gross domestic product ken 7.4 % a panagngato manipod iti Fiscal Year 2025 budget a P6.326 trillion, sigun iti Department of Budget and Management (DBM).
Sigun kenni Budget Secretary Amenah Pangandaman, ipangpangruna ti FY 2026 National Budget ti human capital development babaen ti panangipangpangrunana kadagiti investments iti de kalidad nga edukasion, healthcare, ken workforce upskilling.
Malaksid iti dayta, ti maisingsingasing a pondo ket mangpapigsa kadagiti panagregget a mangparang-ay iti climate ken disaster resilience, mangpasayaat ti social protection systems ken dadduma pay.
Ti singasing a FY 2026 National Expenditure Program ket naituding a maisubmitir iti Kongreso inton Agosto.
