Maysa ti Baguio City National High School kadagiti 14 a pagadalan iti Pilipinas a karaman iti pilot implementation iti Enhanced Senior High School Work Immersion Program iti Department of Education.
Maibasar iti Memorandum No.052, karaman kadagiti focus areas daytoy ti BPO, Manufacturing, ken ti Tourism and Hospitality.
Panggep ti nasao a programa nga ilinya dagiti ti work immersion experiences dagiti estudyante iti agdama a workforce demands tapno ad-adda a mapasayaat ti employability dagiti agturpos iti Senior High School.
Ti immersion program ket maipatungpal babaen iti katulagan iti nagbaetan ti Department of Education ken ti Private Sector Jobs and Skills Corporation(PCORP).
Dagiti pagannurutan para iti daytoy ket saan a mabalin nga iyaplikar kadagiti daduma a Senior High School institutions a saan a saklawen iti nasao nga immersion program.
Nabilin metten dagiti maseknan a field offices ken participating schools nga irebyu a naimbag ken iyimplimintar ti nasao a programa babaen iti nainget a panakikoordinar kadagiti partner industries ken stakeholders.
Kabayatanna, maiyimplimintar daytoy iti School Year 2025-2026 ken maituloy agingga School Year 2026-2027.
Daduma pay kadagiti pagadalan a karaman iti pilot implementation iti Enhanced Senior High School Work Immersion Program ti Rajah Soliman Science and Technology High School idiay Manila, Rizal High School-Pasig, Malanday National High School- Marikina, Tunasan National High School-Muntinlupa,San Nicolas National High School-Ilocos Norte, Angeles City National Trade School-Angeles City, Tanza National Trade School-Cavite, Mamatid Senior High School-Cabuyao City, Santo Tomas National High School-Santo Tomas, San Jose National High School-Occidental Mindoro, Ligao National High School(ALS)-Bicol, Mandaue City Comprehensive Ntional High School-Cebu, ken ti Davao City National High School-Davao City.//Bombo Rob Dominguez
