Nagballaag ti Department of Social Welfare and Development (DSWD) kontra iti panangi-repack ken panangilako manen kadagiti relief items a maipapaay nu adda dagiti mapaspasamak a didigra, kas kadagiti ready-to-eat food (RTEF) boxes.
Sigun kenni Department of Social Welfare and Development-National Resource and Logistics Management Bureau (NRLMB) Officer-In-Charge ken Special Assistant to the Secretary (SAS) Leo Quintilla, dagiti ready-to-eat food ken family food packs (FFPs) ket maipapaay kadagiti biktima ti kalamidad ken emerhensia.
Impaganetgetna a saan a rumbeng a mailako, magatang ken sukatan ti linaonna gaputa panaglabsing daytoy iti Republic Act 10121.
Dagiti food packs ket maiwarwaras a libre babaen ti DSWD wenno babaen iti lokal a gobierno tapno maipasigurado ti kangrunaan a kasapulan dagiti biktima iti panawen ti krisis, sigun paylaeng kenni Quintilla.
