Ngimmato iti 129 ti bilang dagiti overspeeding motorists a natiliw ti siudad ti Baguio manipod Hunio 14 agingga Hunio 23, 2025.
Sigun kenni Mayor Benjamin Magalong, agtultuloy ti nainget a pannangipatungpal ti Baguio City Police Office (BCPO) ti Ordinance No. 18-2019 wenno ti Speed Limit Ordinance of Baguio City kas paset ti estratehiya tapno malapdan ti umad-adu a bilang ti vehicular traffic incidents iti siudad.
Kinuna ti mayor a makaparegta dagiti immuna a resulta gaputa napaliiw ti dakkel a panagbaba ti bilang dagiti aksidente kalpasan ti pannakaipatungpal ti speed limit.
Patienna a daytoy ket nasayaat a pakakitaan a ti pannakaipatungpal ti speed limit ket manglapped kadagiti posible nga aksidente iti kalsada.
Dagiti natiliw a motorista iti kapartak a nalablabes ngem iti naikeddeng a maximum speed a 20 kph iti uneg ti Central Business District ken 30 kph kadagiti makin-uneg a kalsada ket nagrehistron.
Kabayatanna, impakaamo ni Baguio City Police Office Director Police Colonel Ruel Tagel a nakagatangdan ti dua nga speed guns ken dagitoy ket nakalibrate babaen ti Department of Science and Technology, bayat a naipasidong met ti proseso ti “calibration” ti maysa pay nga speed gun.
Iti agdama, manarimaan ti panaggatang ti nasao nga opisina iti Alcohol Breath Analyzer (ABA) a maitunos kadagiti “updated standard specifications” nga inruar ti Land Transportation Office.
