Pimmusayen ti drayber iti natnag a closed van idiay Balacbac Circumferential Road Santo Tomas Proper, Baguio City a napamasak idi kalman ti agsapa.
Saan paylaeng nga inruar ti pulisia ti pakabigbigan daytoy ngem maibasar iti inisial a police report, ti drayber ket tubo ti San Fernando, Pampanga.
Iti pannakiuman ti Bombo Radyo iti maysa a personnel ti BCPO-PS10, natalged itan ti kasasaad ti pahenante a tubo ti Sta. Ana, Arayat, Pampanga.
Maipalagip nga iti salaysay dagiti sumagmamano a residente iti nasao a lugar idi kalman, pasalog ti van ken naklaat dagitoy iti uni ti natnag a lugan iti nasao a paset ti kalsada.
Kinunada a paspas ti panagtaray ti nasao a closed van a gapuanan tapno madadael ti barikada wenno ti kabite iti kalsada a pannakaitunda met ti pannakatnag ti lugan iti rangkis a nasurok 150 meters ti kaunegna.
Iti panagturong ti Bombo News Team, maimatangan a nakaro unay ti pannakadadael ti van ken nagkaiwara ti linaon daytoy a “wagwag.”//
