Nakabalud ita iti Baguio City Jail Male Dormitory ti maysa a lalaki, agtawen ti 51, ken residente ti Barangay Gulon, Ambiong, La Trinidad, Benguet idiay gapu iti kasona nga estafa.
Maibasar iti police report, ti lalaki ket natiliw gapu iti sabali pay a reklamo a naipila kontra kenkuana.
Narekomendaran daytoy iti piansa a ₱100,000 para iti reklamo nga estafa.
Kabayatanna, nakemmeg ti maysa a babai nga agtawen ti 31 a naireklamo gapu iti panaglabsingna iti The Medical Act of 1959 wenno ti Illegal Practice of Medicine idiay Youngland Camp 7, Baguio City.
Impaulog ti Presiding Judge ti 1st Judicial Region, Regional Trial Court, Branch 79 iti siudad ti Baguio ti warrant of arrest a dagos met nga inaksyonan ti Baguio City Police Office-Police Station 10.
Maibasar iti police report, dumanon iti ₱40,000 ti nairekomindar a piansa para iti temporaryo a pannakawayawayana.
