Agtultuloy latta ti disaster preparedness drills ti lokal a gobierno iti siudad ti Baguio iti posible a didigra a sumangbay iti masakbayan.
Iti interview ti Bombo Radyo kenni Mayor Benjamin Magalong, impadamagna a naiyuswat ti Disaster Resiliency Awareness Program idi napalabas a lawas a maipatpatungpal agingga iti agdama.
Panggep ti Disaster Resiliency Awareness Program a maipaayan ti impormasion dagiti indibidual ken komunidad maipapan iti panagsagana iti didigra ken panangkessay iti peggad.
Sigun kenni Mayor Magalong, tallo a tawen ti nasao a programa iti lokal a gobierno ti siudad nu sadinno, daytoyen ti maikatlo a tawenna.
Kabayatanna, impakaamo ni Magalong nga agtultuloy latta ti panagbantayda kadagiti lugar a posible a mapasaran ti panaglayos nangruna ita a panawen ti panagtutudo.
Karaman kadagitoy ti City Camp lagoon a masarakan idiay Lower Rock Quarry Barangay, Baguio City.
