Pimmusay ti 18-anyos a lalaki a ni Kyle Padilla bayat nga agpapaagas dagiti dua a kabsatna nga agtawen iti 8 ken 10 kalpasan a natagtagbat dagitoy iti uneg ti pagtaenganda idiay Asturias, Cebu idi kalman, Hulyo 2.
Ti suspek a ni George Batomalaque, 46-anyos ket uliteg dagiti biktima agsipud ta kabsat daytoy ti inada.
Maibasar iti imbestigasyon ti Asturias Municipal Police Station, napasamak ti krimen iti uneg mismo ti pagtaengan dagiti biktima nu sadino nairana nga awan dagiti nagannakda agsipud ta nagturongda idiay Cebu City tapno maipasidong iti operasyon ti inada.
Rumrumwar a malaksid nga adda ti gura ti suspek iti ama dagiti biktima ket mapapati nga agselselos pay daytoy iti 18-anyos a biktima gapu ta mapapati nga adda relasyonda iti asawana.
Simmuko met ti suspek kalpasan ti krimen.
Sumango daytoy iti kaso a murder ken frustrated murder.
