Inlawlawag ti Korte Suprema a mabalin a makumpiskar wenno i-garnish ti sweldo dagiti opisyal iti gobyerno tapno pangbayad iti utangda, kas maitunos iti linteg.
Iti desisyon nga insurat ni Associate Justice Samuel Gaerlan, kinuna ti Thrid Division ti korte a saan nga exempted iti garnishment ti sweldo ti parapubliko nga opisyal, kas iti kaso ni Atty. Fred Bagbagen.
Sigun iti korte, nadalusanen ti kaso daytoy nga estafa ngem natakuatan ti regional trial court a civilly liable daytoy rason nga impalubos dagitoy a maigarnish ti sweldo a nakadeposito iti bangko tapno mabayadan ti utangna a P308,000 kenni Anna May Perez.
Nupay kasta, impetteng ti nasao a councilor a saan a makolektar ti sweldona agsipud ta maibilang latta daytoy a government property agingga a saan a nagastos.
Iti baet dayta, kinuna ti regional trial court ken ti Court of Appeals nga iti kanito a naideposit ti sweldo ti maysa a public official iti personal bank accountna, saan daytoyen a maibilang a public funds.
