Nakasagana ti Public Order & Safety Division (POSD)-Baguio City nga agresponde iti kanito nga adda dagiti agkasapulan iti tulongda nangruna ita a panagtutudo.
Iti pannakiuman ti Bombo Radyo kenni Benjie Macadangdang, Chief ti Public Order & Safety Division, kinunana a nakaalerto dagitoy rason a nagkakadua dagiti nagduduma a team dagitoy tapno iti kasta ket agtitinulongda iti kanito nga adda ti kalamidad.
Maipalagip nga adda dagiti naideploy iti nagduduma a division kas ti security, peace and order, anti-road obstruction division, calamity, nightmarket division, ken smoke free division.
Nupay kasta, kinunana nga agkurkurang ti manpower dagitoy rason a diretso a makikikoordinarda kadagiti nagduduma nga opisina iti kanito nga adda dagiti didigra.
Ad-adalen metten dagitoy ti posibilidad nga agnayonda iti tao dagitoy agsipud ta adu dagiti isyu a nasken a masolusyonan iti agdama.
Iti baet dayta, impasigurado ni Macadangdang iti publiko a nakasagana dagitoy no sadino mabalin laeng a kontaken ti opisinada no adda man dagiti emergency a nasken a marespondean.
