Agtultuloy a mapatpatibker dagiti agtutubo babaen ti Youth For Peace Program iti siudad ti Baguio.
Sigun kenni Jenny Rose Palangdao, Presidente ti Youth For Peace-Baguio, ti nasao a programa ket maysa a national organization a naka-angkla iti sustainable development goal peace and development.
Iti nasao a programa, maipapakaamo dagiti responsibilidad dagiti agtutubo ken maipapakaamo metlaeng ti pagrebbenganda ken akemda maipapan iti West Philippine Sea.
Daytoy ket kalpasan a naisayangkat ti SEAries of Waves: WPS Victory Day-Our Seas. Our Rights. Our Future” nga addaan ti tema a “Honoring our Triumph, Defending our Seas” a naangaya iti kadakkelan a mall nu sadinno, naobserbaran ti presensia ti nasao a grupo.
Kabayatanna, saan laeng a panangipakaamo kadagiti agtutubo ti maipapan ti West Philippine Sea, nu diket adu pay dagiti maisaysayangkat para kadagitoy.
Karaman ti lectures maipapan ti saan a panagaramat ti iligal a droga, anti-terrorism, ken cyberlibel.
Malaksid iti dayta, maysa pay kadagiti topiko a pagpokpokusan dagitoy ket dagiti banag a pakairamramananda a kas ti anti vaping, anti smoking ken daduma pay.
Mangisaysayangkat metlaeng ti nasao a grupo ti youth summits, clean up drives, tree planting ken dadduma pay.
Sigun kenni Palangdao, nakalukat ti grupoda kadagiti estudiante wenno siasinoman nga indibidual a mangayat a makipaset iti grupoda.//Bombo Noveh Organo
