Pinalawa pay dagiti otoridad ti search and rescue operations para iti panagsapul kenni Patrolman Aaron Blas ti Apayao, maysa a police trainee, a mapukpukaw idi paylaeng Hulio 14 bayat ti land navigation exercise idiay Itogon, Benguet.
Sigun kenni Maj. Edwin Sergio, pannakangiwat ti Benguet Provincial Police, iti baet ti karit ti panawen ken ti nangato a bantay, ar-aramiden dagiti responders ti kabaelanda a panagsapul iti nasao nga indibidual manipod iti 1.5 km. iti aglawlaw ti training camp idiay Dam 2 agingga iti 18-square-kilometer area.
Maipalagip a ni Blas ket paset ti agtultuloy a 60-day Basic Internal Security Operations Course (BISOC) iti sidong ti Police Regional Office – Cordillera, a nangrugi idi Hulio a uno.
Panggep ti kurso a mapasayaat ti kabaelan dagiti police officers iti anti-insurgency ken anti-terrorism operations.
Pimmanaw dagitoy idi Hulio katorse manipod iti kampoda ken agingga iti agdam ket saanen pay a nagsubsubli daytoy.
Daytoyen ti maika-sangapulo ket tallo nga aldaw a mapukpukaw ni Blas.
