Asidegen a malpas ti setup ti boxing ring para iti charity match iti nagbaetan da Police General Nicolas Torre III ken Acting Davao City Mayor Sebastian “Baste” Duterte iti Rizal Memorial Sports Complex.
Maibasar iti ladawan nga impablaak ti Philippine National Police, addan dagiti lamisaan para kadagiti judges ken medical staff a mangasistar iti laban dagitoy.
Maipalagip a kinarit ni Duterte ni Torre para iti boxing kabayatan ti podcast daytoy no sadino, inawat met daytoy ni Torre.
Sigun kenni Torre aramidenda a Charity Boxing match tapno makaurnongda iti pondo a maipaay kadagiti naapektaran iti layus iti pagilian.
Nupay kasta, nagturong ni Duterte sadiay Singapore ita nga asidegen ti Charity boxing match dagitoy.
Sigun kenni Duterte, saan nga agparang iti naituding a labanda intun Domingo July 27, 2025 gaputa sigun kenkuanna adda ti dadduma nga aramidenna.
Impetteng daytoy a mabalin intun Martes, Mierkules wenno anyaman nga aldaw.
Maipalagip nga immuna a kinuna ni Duterte a sakbay a makilaban kenni Torre, kasapulan a kiddawen ti Chief ti PNP kenni President Ferdinand Marcos Jr. nga agpa-drugtest amin dagiti nabotosan nga opisiales iti gobierno.
