Naangay ti Senate plenary session tapno mapagtalantanan ti impeachment kontra kenni Vice President Sara Duterte idi August 06, 2025.
Napagnunumuan ti Senado nga i-archive ti article of impeachement kontra kenni Vice President Sara Duterte.
Kayatna a sawen a mailasin iti rekord ti Senado ti reklamo a naipila kontra kenni VP Sara, ken mabalin a malukatan manen no kasapulan.
Iti nasao a pangngeddeng dagiti amin a Senador, 19 dagiti umanamong nga i-archive, uppat ti saan nga umanamong bayat a maysa ti mangkayat a maitantan ti immuna a motion to dismiss nga impila ni Senador Rodante Marcoleta seknan iti impeachment case ni VP Sara.
Dagiti umanamong nga i-archive ti impeachment case ket pakairamanan ni Sen. Ala Peter Cayetano, Sen. Pia Cayetano, Ronald dela Rosa, Sen. JV Ejercito, Sen. Francis Escudero, Sen. Jinggoy Estrada, Sen. Sherwin Gatchalian, Sen. Christopher Lawrence Go, Sen. Lito Lapid, Sen. Loren Legarda, Sen. Rodante Marcoleta, Sen. Imee Marcos, Sen. Robin Padilla, Sen. Erwin Tulfo, Sen. Raffy Tulfo, Sen. Joel Villanueva, Sen. Camille Villar, Sen. Mark Villar ken Sen. Juan Miguel Zubiri.
Mainaig iti dayta, saan nga umanamong nga i-archive ti impeachment iti bise Presidente da Senate Minority Leader Tito Sotto lll, Senator Risa Hontiveros, Senator Bam Aquino, Senator Kiko Pangilinan bayat a nag-abstain ni Senador Ping Lacson.
Kabayatanna, inlawlawag ni Senate Minority Leader Tito Sotto, a mabalin masublian madagiti articles of impeachment kontra kenni Vice President Sara Duterte manipud iti archives ti Senado, no baliktaden ti Korte Suprema ti immun-una a desision dagitoy.
