Imbutaktak ni Baguio City Mayor Benjamin Magalong a dumanon iti 67 a kongresista ti karaman iti panagaramat iti peke a kontraktor kas “front” kadagiti proyekto ti gobierno.
Sigun kenni Mayor Magalong, posible nga awanen iti takem dagiti dadduma a kongresista iti 20th Congress gaputa posible a nauma dagiti umili a maisubli dagitoy iti Kamara.
Sigun pay kenkuana, sumagmamano pay a mammanday-linteg ti agar-aramat kadagiti asawa ken anakda kas kontraktor ngem ti kinaagpaysuanna ket dagitoy metlaeng ti agkonkontrol iti kontrata.
Kabayatanna, kinuna pay ni Magalong a maysa kadagiti anomalia iti flood control project ket ti 1 metro laeng a sheet pile ti naikabil imbes a 9 a metro.
Innayonna a nalabes ti markup iti presio dagiti materiales, no dadduma ket dumanon iti P92/kg manipud iti aktual a P34/kg.
Impaganetget ni Magalong nga awan patinggana ti kinaagum ken panagtakaw dagiti karaman iti korapsion wenno panagkusit.
Maipalagip nga immunan nga imbutaktak ni Mayor Magalong ti anomalya itay laeng nabiit, ken kinunana a sidadaan daytoy a mangidaulo ti imbestigasion tapno sungbatan dagiti kongresista ti korapsion.
