Agtultuloy latta ti panagregget dagiti kameng ti Benguet Provincial Police Office ken dadduma pay nga indibidual ken opisina iti panagsapul kenni Patrolman Aaron Blas ti Apayao, a napukaw iti uppat a pulo ket uppat nga aldaw.
Iti exclusive interview ti Bombo Radyo kenni Police Major Edwin Sergio, pannakangiwat ti Benguet Provincial Police Office, kinunana nga addan ti nabukelda nga special task force a mangtutok iti panagsapul kenni Blas.
Karaman ni Blas iti composite group dagiti kameng ti pulisya ti Cordillera a naipasidong iti innem a pulo nga aldaw a Basic Internal Security Operations Course iti Police Regional Office – Cordillera training camp sadiay Itogon, Benguet.
Ti training dagitoy ket nagrugi pay idi Hulio a uno.
Idi Hulio 14, ni Blas ken ti kakaduana a trainee ket pimmanaw iti alas sais ti agsapa para iti land navigation exercise.
Nadiskobre laengen a mapukpukaw ni Blas bayat ti attendance check iti alas tres ti malem ken alas singko ti malem a rason ti dagos a panagsapulda kenkuana.
Naudi a naimatangan daytoy iti Zigzag area, asideg iti Dam 2 iti uneg ti Philex Mining Corp. compound.
Dagiti search and rescue teams ket buklen ti police personnel ken volunteers.
Itay laeng nabiit, pinalawa pay ti bungoy ti area a pagsapulanda kenni Blas.
Nangidiaya metten ti pamilia ni Blas iti P200,000 a gunggona para iti impormasion a mangiturong iti lokasionna.
