Nakemmeg ti maysa a babai, agtawen ti 38, single, awanan trabaho ken agdama nga agnanaed idiay Slaughter Compound, Magsaysay Avenue, Baguio City kalpasan a tinakawanna ti maysa a lalaki nga agtawen ti 30 a residente ti Itogon, Benguet.
Maibasar iti imbestigasion ti Baguio City Police-Police Station 7, rimmuar ti biktima iti balay paginuman idiay Magsaysay Avenue idi inasitgan daytoy ti suspek ken inawisna nga ag-hotel dagitoy para seksual a pannakainaig.
Nagkedked ti biktima ngem nabaelan metlaeng ti suspek a guyuguyen ti rikna ti biktima.
Nagpara ti suspek ti taxi ngem nagkedked manen ti biktima nga aglugan, ngem inguyod ti suspek a sumrek daytoy.
Bayat nga adda dagitoy iti uneg ti lugan, narikna ti biktima a “sweet” ti suspek agingga a nakagteng dagitoy iti Jacinto Street, a pakasarakan ti maysa nga “inn.”
Sakbay a bimmaba dagiti dua, inruar ti biktima ti kuartana tapno agbayad ngem gaputa awan ti pagbarya ti drayber ti taxi, ti suspek ti nagbayad ti pamasahe dagitoy.
Iti dayta a gundaway, nadlaw metlaeng ti biktima a mapukpukaw ti kuartana a dumanon iti P12,000.
Kinumprontar ti biktima ti babai ngem dagos a timmaray ket saannan a nakamatan ken nasiputan ti nagturunganna.
Inkagumaan latta met ti biktima a biruken ti suspek, ken nagsubli daytoy iti nagkitaanda.
Idi nagsubli iti Jacinto Street, ditoyna metten a nakita ti suspek a rumrummuar manipod iti maysa a pasdek.
Nairana met nga adda ti police mobile nga agpatpatrolia nga isut nagpatulungan ti biktima a nangitunda ti pannakakemmeg ti suspek.//Bombo Noveh Organo
