Opisial nga inyuswat dagiti agtutubo iti Cordillera ti kampaniada a hashtag Student Deserve Better (#StudentsDeserveBetter) ken hashtag Filipinos Deserve Better (#FilipinosDeserveBetter) bayat ti maika-sangapulo ket dua a Baguio Students Day (BSD 2025) a naangay iti University of the Philippines Baguio itay laeng kallabaes.
Babaen iti pammatalged ti Baguio City Ordinance 43, s. 2013, nakapag-ummong ti Baguio Students Day iti nasurok uppat a gasut nga student leaders manipod iti sangapulo ket lima a pagadalan iti siudad ti Baguio ken Benguet iti panawagan a panagkaykaysa para iti pagsayaatan ti edukasion ken serbisio para kadagiti amin a Pilipino.
Sigun kenni Eugene Enciso, pannakangiwat ti National Union of Students of the Philippines – Cordillera (NUSP Cordillera), ti Baguio Students Day ita a tawen ket agserbi kas “launchpad” para kadagiti estudiante para iti transparency, accountability, panangpasayaat manen ti sektor ti edukasion ken serbisio iti publiko a maikari para kadagiti Pilipino.
Immunan a naipablaak itay laeng nabiit a nakessayan ti budget ti Cordillera State Universities and Colleges (SUCs) iti ₱1.3 billion iti innem a pagadalan nu sadinno, dua nga State Universities and Colleges (SUCs) iti rehion ti kadakkelan ti nakessayan a pondo iti intero a pagilian.
Intampok pay dagiti estudiante a kadagiti pribado a pagadalan, agtultuloy ti panagngato ti matrikula ken dadduma pay a bayad iti tunggal tawen uray no agtalinaed a saan nga umdas dagiti pasilidad ken serbisio dagiti estudiante.
Inyunay-unay ni Enciso nga agkaykaysada nga agtutubo iti Cordillera kadagiti pada a Pilipino iti intero a pagilian inton Setiembre baente uno, ti maika-lima pulo ket tallo nga anibersaryo ti Martial Law iti sidong ni Marcos Sr. tapno kondenaren ti korapsion iti sidong ti agdama a Marcos-Duterte administration.
