Inrekomendar ni Navotas City Representative Toby Tiangco kenni House Speaker Faustino “Bojie” Dy III a sukimatenna ti pudno a medical condition ni Ako Bicol Party-list Representative Zaldy Co.
Sigun kenni Tiangco, kasapulan a makiddaw ti medical certificate ni Co tapno maduktalan nu ti sakit daytoy ket life-threatening.
Kaspangarigan saan a narisgu unay ti kasasaad ti salun-at ti sigud nga House Appropriations Committee Chairperson, impetteng ni Tiangco nga awan iti rason tapno saan nga agawid daytoy iti Pilipinas.
Ni Co ket maatap a nagturong idiay Estados Unidos para iti medical treatment nu sadino, sigun kenni House spokesperson Princess Abante, ti panagbiahe daytoy ket “duly backed” iti kaskenan a travel documents ngem saanen a nadakamat nu agingga kaano ti medical absence ti nasao a kongresista.
Sumangsango ni Co iti akusasyon mainaig kadagiti naanomalyaan a flood control projects partikular ti binilbilyon a piso a maatap nga insertions daytoy iti 2025 national budget.
Guyguyuguyen metten daytoy ni House Majority Leader Sandro Marcos nga agawid tapno sangwen dagiti akusasyon gapu ta patien ti anak ti presidente a nakaron a maap-apektaran ti Kamara.
Kinunana met a posible a maipilaan iti ethics complaint ni Co nu saan nga agawid.
Malaksid iti dayta, immuna metten nga insingasing ni House Deputy Speaker Ronaldo Puno a pwersain ti panangpaawid kenni Co nu kasapulan nangruna ket addaan iti extradition treaty ti Estados Unidos ken ti Pilipinas.
