Bimmisita ti mabigbigbig a maysa kadagiti kalaingan ken natalak a pianist iti sangalubungan a ni Cecile Licad iti Baguio Country Club (BCC), Baguio City idi laeng Sabado.
Nag-perform daytoy iti libre a konsierto para kadagiti members, guest, ken iti lokal a komunidad, kagiddan ti agtultuloy a panagrambak ti maika-120 nga anibersaryo ti Baguio Country Club.
Ti “milestone year,” a pormal a nangrugi idi Pebrero disi otso, ket namarkaan babaen ti agsasaruno nga aktibidad a mangipaganetget iti naisangsangayan a tradision, inobasyon, ken pannakipaset ti komunidad ti Baguio Country Club.
Sigun kenni General Manager Anthony de Leon, ti kabayagan a nagserbi a dadaulo iti club, utangda kadagiti tattao, organisasion, suporta dagiti direktor ken dagiti kameng ti club ti kabayag ti Baguio Country Club.
Impaganetgetna nga iti baet ti agbalbaliw a panawen, impakaamona nga agtaltalinaed latta ti “heritage” ken ti serbisio ti club nga agingga iti agdama ket mangiladawan iti Baguio Country Club.
Iti napalabas a mano a dekada, ti Baguio Country Club ti agserserbi kas maysa a paggwadan ti standard para iti hospitality ken tourisma iti siudad ken iti dadduma a lugar.
Karaman kadagiti pammadayawna, ti BCC ket Hall of Famer ti ASEAN Green Hotel Award, a mangipakita iti napigsa a panagkumitna kadagiti sustainable tourism practices.
