Manamnama a mangideploy ti Philippine National Police (PNP) iti nasurok 25,000 a kameng daytoy para iti umadanin nga All Souls’ Day ken All Saints’ Day inton November 1 ken 2.
Daytoy ket tapno maipasigurado ti linak ken urnos kabayatan dagiti nasao nga aldaw a paset iti tinawen a panakalagip dagiti ipatpateg a pimmusayen.
Sigun kenni PNP spokesperson Police Brigadier General Randulf Tuaño, malaksid kadagiti kameng iti pulisya, maideploy metlaeng para iti Oplan Undas dagiti 8,265 a kameng iti Bureau of Fire Protection (BFP), Armed Forces of the Philippines (AFP), ken ti Philippine Coast Guard (PCG).
Dumanon met iti agarop 2000 a force multipliers ti makitinnulong para metlaeng iti peace and order nga agtaud kadagiti local government ken non-government organizations.
Sigun kenni Tuaño, dagiti nasao a personnel ket maidesignar kadagiti 5,175 a sementeryo, kolumbaryo, ken memorial parks kadagiti nagduduma a lugar iti Pilipinas.
Kabayatanna, 5,293 a police desks ken 1,660 a motorist assistance desks met ti maimuntar kadagiti disso a kadawyan a pagdadapunan ti tattao kas kadagiti terminal ken sangladan.
