Kweskwestyunaran ita dagiti sumagmamano a residente ti Dominican-Mirador Barangay ti maysa a pasdek a tagikua ti barangay a naipaabang kas maysa a paglakuan a saan a dimmalan iti pammalabus ti barangay council.
Sigun iti impormasyon a nakalap ti Bombo Radyo, maatap nga impaabang ni Barangay Captain Karol Domogan ti nasao nga istraktura a saan a dimmalan iti kunsultasyon kadagiti miembro ti barangay council ken naipaabang daytoy nga awanan ti napirmaan a Memorandum of Agreement.
Naduktalan pay a ti nasao a pasdek ket intulok ni Domogan nga adda ti agnegosyo ken aglako iti prutas ken nateng nga awanan ti Business Permit manipud iti Baguio City LGU.
Immunan a nairangta ti kabarbaro a pasdek kas opisina para iti kakaisuna a Kooperatiba ti barangay ngem sabali metten ti nakausaran na.
Maur-uray ti komento ken pammalawag ni Domogan kadagiti alegasyon kontra kenkuana.| via Bombo Radyo Newsteam
