Impakaammo ni Assistant Ombudsman Mico Clavano a nakipagsarita ni sigud a Department of Public Works and Highways undersecretary Catalina Cabral iti lima nga Ombudsman prosecutors sakbay a napasamak ti insidente a nakatayan daytoy.
Nupay kasta, nagkedked ni Clavano a mangibutaktak iti nagan dagiti indibidual a nakasarita ni Cabral.
Sigun kenni Clavano, saannan nga ibutaktak ti nagan dagitoy tapno agtalinaed ti integridad ti ibestigasion dagitoy.
Daytoy ti kinuna ni Clavano, bayat ti panangipasiguradona iti publiko a dagiti ebidensia a naurnongda manipud kenni Cabral ket mabalin nga i-secure dagiti government prosecutors.
Maipalagip a kinompirmar ti Benguet police ti ipupusay ni Cabral gapu iti “alleged fall.”
Immuna a nasarakan daytoy nga “unconscious ken unresponsive” iti 20 agingga 30 a metro iti baba ti highway, partikular iti igid ti Bued river sadiay Tuba, Benguet idi Diesiembre 18, 2025.
