Nasuspendir ti lisensiya ti driver ti Toyota Fortuner a karaman iti insidente ti road rage iti Baguio City a nagviral iti social media.
Daytoy ket kasaruno ti show cause order nga inruar ti Land Transportation Office (LTO) kenkuana gapu agresibo nga aksyon daytoy kontra iti maysa a parking attendant iti maysa a tourist spot iti siudad.
Imbilin ti LTO iti driver a sumango iti Intelligence and Investigation Division (IID) inton Enero 8, 2026.
Nabilin metlaeng daytoy a mangisubmiter iti verified wenno sworn statement sakbay ti naituding a petsa tapno agpalawag nu apay a saan daytoy a sumango iti administrative case pakairamanan ti posible a deklarasyon ti Improper Person to Operate a Motor Vehicle.
Malaksid iti pannakasuspendir ti lisensiya ti nasao a driver, naipasidong iti ALARM status ti Toyota Fortuner ken nabilin ti driver nga isukona ti lisensiyana iti LTO-IID bayat nga agtultuloy ti imbestigasyon.
Inyunay-unay ni LTO Assistant Secretary Markus V. Lacanilao ti kinapateg ti disiplina ken panagbalin a kalmado.
Innayonna pay a ti lisensiya iti panagmaneho ket maysa a pribilehiyo ken saan a maysa a karbengan gapu ta nu asinuman ti mapaneknekan a saanna a kabaelan nga agmaneho nga addaan iti disiplina, panagrespeto ken panagbalin a responsible ket mabalin a mapukawan iti pribilehiyo iti aniaman nga oras.
