Saan a bumaba iti 116 nga indibidwal ti pimmusay idiay Iran kagiddan ti mapaspasamak a tignay-protesta iti nagduduma a lugar sadiay.
Sigun iti mapagtalkan a source, karaman kadagiti pimmusay dagiti 7 nga ubbing ken 109 a security personnel bayat nga adda pay dagiti 2,638 a naarestar.
Ti lokasyon dagiti tignay-protesta idiay Iran sipud nangrugi daytoy ket dumanonen iti 574 iti uneg dagiti 185 a munsipyo ken 31 a probinsya iti nasao a nasyon.
Namarkaan metten idi Sabado ti maikadua a lawas a pa-ut dagiti nasao a tignay-protesta.
Maipalagip a nangrugi ti tignay protesta idiay Iran kadagiti naudi nga al-aldaw iti Disyembre idi napan a tawen gapu iti pakaseknan mainaig iti ngumatngato nga inflation ken daduma pay a mainaig iti ekonomiya a makaap-apektar iti biag dagiti umili.
