Agkaykaysa dagiti European leaders iti pananglapped kenni United States President Donald Trump iti panggep daytoy a mangkontrol iti autonomous territory iti Denmark a Greenland.
Daytoy ket kasaruno ti panagpangta ni Trump a patawanna iti 10% a taripa dagiti amin a banag a maipatulod idiay Estados Unidos nga agtaud idiay Denmark, Norway, Sweden, France, Germany, the U.K.,the Netherlands ken Finland.
Sigun kenni Trump, agepektibo ti nasao a tignay inton February 1 bayat nga agbalin met a 25% daytoy nu madanon ti June 1.
Impetteng ni Trump nga agtultuloy nga epektibo ti panakaipataw ti taripa agingga a maala ti Estados Unidos ti Greenland.
Kabayatanna, impatangken met ni European Commission President Ursula von der Leyen a sangwenda ti pressure ni Trump babaen iti panagkaykaysa dagitoy.
Innayonna a pakapsuten ti nasao a taripa ti transatlantic relations ngem impasiguradona nga agtalinaed ti Europe a united, coordinated ken committed iti panangmintinir daytoy iti bukodna a soberanya.
