Agsapsapul ti gobierno ti siudad ti Baguio iti pondo manipud iti DPWH ken iti Tourism Infrastructure and Enterprise Zone Authority.
Kagiddan daytoy iti panangadal manen ti siudad ti naisingasing a sanitation fee tapno mapasayaat ti nabayag ken daanen a wastewater system ti siudad.
Ti singasing a bayad—a katupag ti 16% water consumption ti maysa a balay—ket makolektar babaen iti Baguio Water District ken daytoy ti kangrunaan a requirement tapno masiguro ti “loan” tapno mapasayaat ti kakaisuna a sewage treatment plant ti siudad ken mapalawa ti sewer network daytoy.
Immunan a kinuna dagiti konsehal iti siudad a naituding nga umawat ti Baguio iti 45-million-dollar loan manipod iti Asian Development Bank babaen iti Tourism Infrastructure and Enterprise Zone Authority, ngem nataktak ti proyekto gapu iti kaawan dagiti kasapulan nga ordinansa.
Nagpakdaar ni Vice Mayor Faustino Olowan a ti “untreated sewage” wenno saan a nasayaat a planta ti danum ket agtultuloy a mang-pollute kadagiti kangrunaan a river systems ken ti siudad ket posible a sumango ti pannusa iti agingga iti P200,000 iti tunggal aldaw manipod iti DENR.
Malaksid iti sanitation fee, ad-adalen pay ti konseho ti naisingasing a 150-peso environmental user’s fee para kadagiti turista.
Kinuna ti maysa nga opisial ti City Environment Office nga imbilinen ni Mayor Magalong ti pannakaisubmitir manen ti singasing a pautang ti ADB ken kiniddawna ti pannakairaman ti Baguio kadagiti national wastewater funding programs.
