Ni sigud nga Ako Bicol Rep. Elizaldy “Zaldy” Co nga adda ita idiay Portugal ket ibagbagana a nakasagana nga agsubli iti pagilian a Pilipinas tapno agtestigo iti maikatlo nga impeachment complaint a naipila kontra kenni President Ferdinand Marcos Jr.
Daytoy a kinuna ni Co ket mangipakpakita iti komplikado a koneksyon ti kredibilidad, legalidad, ken proseso iti pulitika iti pagilian.
Nupay impetteng ni Co a nakasagana daytoy nga agtestigo tapno mapapigsa ti impeachment complaint kontra iti presidente, adda dagiti opisyal kas kenni Senador Sherwin Gatchalian a nagduadua iti kredibilidad ni Co gapu iti panagtalinaed daytoy iti dadduma a pagilian ken ti manarimaan a pannakaiserbi ti warrant of arrest kontra kenkuana.
Iti konteksto ti impeachment, saan nga umdas ti balikas manipud iti ballasiw taaw, nu di ket napateg ti pisikal a presensiya tapno masigurado ti integridad ken pigsa ti testimonya.
Siguk kenni House Public Accounts Panel Chairperson Rep. Terry Ridon, asinuman nga indibidwal nga agtestigo iti impeachment proceedings ket kasapulan a sumango iti hearing, saan a mapalubosan ti pangipaay iti testimonya babaen iti teleconference.
Iti daytoy a sitwasyon ipakpakitana ti istrikto a panangsurot iti legal ken procedural a pagalagadan.
Malaksid iti daytoy, makita metlaeng ti political dimension ti kaso.
Dagiti alegasyon maipapan iti anomalya iti national budget ken flood control projects, pakairamanan ti maatap a P100 billion insertions ket mangituntunda iti tensyon iti nagbaetan ti agdama nga administrasyon ken kadagiti aggangandat a mangipila iti impeachment complaint.
Ti panagkedked ti Office of the Secretary General a mang-awat iti impeachment complaint kontra iti presidente gapu iti kinaawan ti dadaulo wenno opisyal dagitoy ket mangipakpakita metlaeng iti karit iti procedural aspect.
Iti pakabuklan, ti isyu ket mangipakpakita iti kredibilidad, pisikal a presensya, ken umno a panangsurot iti legal a proseso tapno agbalin a naannayas ti impeachment proceedings.
Numan pay adda ti potensyal iti testimonya ni Co a mangpabilig iti kaso ti presidente, agtaltalinaed latta a sentro ti saritaan ti kredibilidad, integridad ken legalidad ti proseso.//Bombo Cara Sacyaten
