BUGUIAS, BENGUET – Agtultuloy a madaldalyasat ti paset ti Halsema Highway idiay Kilometer 73, Pilando, Buguias, Benguet nupay saan a siento porsiento a naileppas ti konstruksyon daytoy.
Maipalagip a nagbalin a kontrobersiyal ti nasao a kalsada kalpasan a nargaay daytoy idi Agosto 23, 2024 kasaruno ti napasaran a masansan a panagtudo.
Nakaapektar met daytoy kadagiti biahero nangruna kadagiti mannalon a mangibiahe kadagiti apitda a nateng iti trading areas idiay La Trinidad, Benguet.
Nagserbi kas alternative route dagiti mannalon ti Kabayan, Benguet ken Cervantes, Ilocos Sur idi daydi a panawen a nakanayon iti dua agingga tallo nga oras manipud iti kadawyan a travel time.
Temporaryo metlaeng nga adda ti naaramid a pathway babaen iti pribado a lote nga asideg iti nargaay a paset ti kalsada nga iti agdama ket nairekep metten gapu iti pannakaisimpa ti main road.
Babaen iti panagtitinnulong dagiti umili ken panag-aksyon dagiti maseknan nga opisina ken opisyal ket in-inot a naisimpa ti Pilando Road nga iti agdama ket maar-aramaten ken manamnama ti ad-adda a pannakapasayaat pay daytoy.
