Mangisayangkat ti National Police Commission (NAPOLCOM) iti PNP Entrance Examination (PNPEE), Promotional Examinations (PROMEX), ken Police Executive Service Eligibility -Written Examination (PESE-WE) iti intero a pagilian intun April 19, 2026.
Gapu iti dayta, aw-awisen ti NAPOLCOM-Cordillera dagiti amin a kualipikado a makipaset iti eksaminasyon.
Sigun iti nasao nga ahensia, mabalin nga ageksamin dagiti Baccalaureate Degree holder iti PNP Entrance Examination; para met kadagiti kameng ti PNP ti Promotional Examination bayat a ti PESE Written Examination ket para kadagiti Police Lieutenant Colonel (PLCOL) nga addaan iti permanente nga status.
Mangrugi ti online Registration iti 12:00 pm intun February 16 agingga intun February 20, 2026 babaen iti www.napolcom.gov.ph.
Maipatungpal ti pannakaiproseso kadagiti Examination Center a masarakan iti siudad ti Baguio, Abra ken Apayao.
Naituding intun February 18 agingga March 20 ti proseso iti NAPOLCOM CAR Office iti siudad ti Baguio; March 3 agingga 5 iti Abra Police Provincial Office sadiay Bangued, Abra bayat a naituding met intun March 10 agingga intun 12, 2026 iti San Isidro Sur Barangay Hall, Luna Apayao.
Kabayatanna, naituding ti eksaminasyon intun April 19, 2026 partikular kadagiti examination Centers kas iti Baguio City High School iti Governor Pack Road Barangay, Baguio City; University of Abra, Bangued Campus iti Bangued, Abra ken iti Apayao State College, Luna Campus sadiay Luna Apayao.
Mangrugi ti eksaminasyon iti 8:00 am agingga iti 11:00 am.
Para kadagiti interesado ken kanayunan nga impormasyon, mabalin a macontact ti naidesignar a Public Information Officer a ni Ms. Soledad D. Benwaren iti landline number a (074) 442-7193/443-4744 wenno iti Cellphone number a 09999660131.
