Inlawlawag ni Senate President Vicente “Tito” Sotto III a nagnunumwan ti majority bloc a rumbeng a miembro metlaeng dagitoy ti agserbi a chairperson iti major committee a Foreign Relations a sigud nga idadauloan ni Senator Imee Marcos.
Sigun kenni Senator Sotto, ti rason ti panakasukat ni Senator Marcos iti nasao a posisyon ket awan ti pakainaiganna iti saan daytoy a panagpirma iti proposed resolution a a mangkonkondenar kadagiti kinuna ti Chinese Embassy kontra kadagiti partikular nga opisyales ti gobyerno ti Pilipinas.
Innayonna nga idi damo ket impaturayda kenni Senator Marcos ti nasao a chairmanship gapu ta mangnamnama dagitoy a makadwada ti senadora iti majority bloc.
Nupay kasta, miembro ita ni Senator Marcos iti minority bloc rason a kinasapulanda a sukatan ti chairperson iti nasao a komite.
Immuna metten a kinumpirma ni Senate President Pro Tempore Panfilo “Ping” Lacson idi Huwebes ti maipapan iti nasao a pakaseknan.
Ti Senate Foreign Relations ket responsable kadagiti pakaseknan mainaig iti relasyon ti Pilipinas kadagiti daduma a pagilian, diplomatic ken consular services, United Nations Organization ken daduma nga ahensya daytoy, multilateral organizations, Association of Southeast Asian Nations, ken kadagiti Pilipino iti ballasiw-taaw.
Kabayatanna, kinuna ni Senator Sotto a nabayag metten a nangipakita ni Senator Erwin Tulfo iti interes nga idauloan ti nasao a komite nga immuna metten a naiprisinta a mangsukat kenni Senator Marcos.
Nupay kasta, manamnama a makumpirmar ti sumukat iti nasao a posisyon inton February 2.
