Nangrugin a ngimmato ti presyo dagiti sabong iti Baguio City ita nga umadanin ti Valentine’s Day.
Iti panagrikos ti Bombo Radyo kadagiti pagtagilakoan iti merkado publiko iti siudad ti Baguio partikular iti bagsakan dagiti sabsabong, dandani doble itan ti presyo dagiti Rosas a maysa kadagiti kangrunaan a magatgatang para iti nasao nga aldaw.
Sigun iti maysa a flower vendor, dumanon itan iti agarop ₱1,600 ti presyo ti Rosas iti bagsakan manipod iti ₱800 tunngal bundle a sigud a presyo daytoy, nanginnginan ngem kadagiti imported a sabong.
Mainaig iti dayta, iti panakiuman ti Bombo Radyo iti maysa a cut-flower farmer, imbinglayna a kabaelanda a suplayan dagiti customer ita a bulan dagiti puso.
Sigun kenkuana, ti nasao a selebrasyon ti maysa kadagiti isagsaganaan dagiti cut-flower farmer gapu ta daytoy ti namnamaenda a pakabawi-anda iti pamastrekan malaksid iti All Souls’ Day ken All Saints’ Day.
Kabayatanna,iti agdama ket naobserbaran dagitoy a nasayaat ti panagdakkel dagiti Rosas ngem adda laeng ti bassit a panakaapektarna iti nalamiis a panawen.//Bombo Noveh Organo
