Pimmusay ti 32-anyos a public teacher ken sigud a national beauty pageant finalist kalpasan a napaltogan iti uneg ti lugan daytoy iti sanguanan ti balay daytoy idiay San Manuel, rabii ti Byernes.
Binigbig dagiti kapulisan ti biktima a ni Lullete Jane Ramilo-De Guzman.
Sigun iti imbestigasyon, nakatugaw daytoy iti uneg ti maysa nga sports utility vehicle kaduana ti tallo nga anak daytoy iti ala-sais kwarenta’y singko ti rabii idiay Barangay Cabaritan idi killaat a pinalpaltogan ti saan pay a nabigbig a suspek a nakasakay iti maysa a motor nga awan plaka na.
Naitaray pay ni Ramilo-De Guzman idiay Manuel Roxas District Hospital ngem naideklra daytoy kas dead on arrival gapu iti tama ti bala iti rupa ken bagi daytoy.
Nupay saan a nadangran dagiti annak daytoy, maibasar iti report, nakigtot dagiti ubbing gapu iti nasaksianda.
Maipalagip a runner-up ni Ramilo-De Guzman iti 2013 Miss Philippine-Earth ken nakagun-od met laeng daytoy kadagiti special awards.
Mannarimaan meten ti imbestigasyon dagiti otoridad seknan iti nasao a pasamak. Iti agdama, awan pay laeng ti nabigbig a suspek kabayatan nga maururay ti resulta ti forensic examination tapno maamuanda ti naaramat a paltog. // Bombo Karen Sapirao
