Pinatganen ti International Criminal Court (ICC) Pre-Trial Chamber I ti kiddaw ti kampo ni sigud a president Rodrigo Duterte a saan nga umatendar iti confirmation of charges a naituding a mangrugi inton Lunes,February23.
Iti desisyon nga inruar ti ICC chamber idi laeng kalman, inlanad daytoy a dagiti legal requirements ket naipaay ti kampo ni FPRRD iti insumitir dagitoy a formal request.
Kagiddan dayta,nagngeddeng metlaeng ti ICC a maituloy latta ti confirmation of charges uray awan ni Duterte maitunos iti probisyon ti Rome Statute a mabalin latta a maituloy dagiti confirmation of charges uray saan nga umatendar dagiti akusado.
Nupay kasta, inlawlawag ti international tribunal a maiyaplikar laeng ti desisyon para iti confirmation of charges ken kaspangarigan panggep ti sigud a presidente a saan nga umatendar iti annual detention hearing a naituding inton February 27 ket kasapulan a mangipila dagitoy iti sabali manen a waiver.
