Baguio City- Nangisayangkat ti inspeksyon da Mark Lapid, Chief Operating Officer (COO) ti Tourism Infrastructure and Enterprise Zone Authority (TIEZA) ken Mayor Benjamin Magalong iti patrabaho iti maipatpatungpal a redevelopment ken rehabilitation ti Burnham Lake.
Nangipaay ti positibo a reaksyon ni Lapid iti nasao a proyekto nu sadino ket manamnama a maileppas daytoy intun Mayo iti agdama a tawen.
Iti agdama ket dumanonen iti 40% ti maisaysayangkat a patrabaho iti nasao a lugar ken agtaltalinaed a karit iti kontraktor iti panagaramid iti natibker nga slope protection nga iti agdama ket addan iti 70% completion.
Ti Burnham Lake Rehabilitation and Development Project ket tapno mapapintas ti ecological balance, mapasayaat ti kalidad ti danum babaen iti dredging ken revitalisation ken mabaliwan ti pakabuklan a langa ti nasao a pagpasyaran kas iti mapalawa a docking area, view deck, pagtugawan a nakasango iti lake, brick-paved sidewalks karaman ti world class a lighting facilities.
Dumanon iti agarup 400 million pesos ti pakabukalan a pundo ti inlatang ti TIEZA para iti pakabukalan a rehabilitation ken development ti Burnham Park nu sadino karaman a mapasayaat ditoy ti Childrens Park, Skating Rink ken dadduma pay a paset ti parke.//Bombo Jordan Tablac
