Nangilipa dagiti maseknan a residente ti San Luis Village, Baguio City iti application for Preliminary Injunction (PI) with Temporary Restraining Order (TRO)idiay Korte Suprema para iti panakaisardeng ti maar-aramid a pagbaludan iti nasao a barangay.
Iti panakiuman ti Bombo Radyo iti maysa kadagiti apektado a residente a ni Mark Anthony Baliton,kinunana a mangnamnamada a denggen ti nasao a korte ti pakaseknan da tapno saanen a maituloy ti proyekto.
Sigun kenni Baliton, idi paylaeng February 2025 a nangisumitirda iti opposition seknan iti proyekto iti opisina ti mayor ken iti konseho ngem nasdaaw dagitoy idi naduktalanda nga adda metlaeng ti naisumitir a certificate of no opposition manipod iti barangay.
Innayon ni Baliton a pinangnamnamaanda pay ti inibbatan a sarita ni Baguio City Mayor Benjamin Magalong a saan a maituloy ti proyekto nu saan nga umannugot dagiti residente idi naangay ti maysa a Kapihan.
Gapu iti dayta, nasdaaw dagitoy iti panakairugi ti konstruksyon iti jail facilty kalpasan a naangay ti ground breaking ceremony September idi metlaeng napan a tawen kasta metten ti panakapukan dagiti kayo para iti disso a pakaibangunan daytoy.
Mainaig iti dayta, imbinglay ni Baliton a ti seguridad ken kinatalged ti kangrunaan a pakaseknanda nu apay a saanda nga ipalubos a maibangon ti nasao a pagbaludan iti lugarda nangruna ket saanda met a mabigbig dagiti kcriminal ken posible a nagduduma a tattao ti agturong sadiay.
Maipalagip a panggep ti maibangon a pagbaludan nga i-decongest dagiti agdama a pagbaludan a mangak-akomodar ita kadagiti Persons Deprived of Liberty (PDL) wenno balud.//Bombo Rob Dominguez
