BAGUIO CITY- Impanamnama ni Baguio City Congressman Mauricio Domogan nga adalenda iti kongreso dagiti posible a solusyon no kasano a maalay-ayan ti mapagdandanagan a dakkel a panagngato iti presyo dagiti produkto a petrolyo ditoy pagilian gapu iti epekto ti tensiyon sadiay Middle East.
Kasaruno daytoy ti waragawag ni President Ferdinand Marcos Jr. nga makikoordinar daytoy iti kongreso para iti posible a panaka-amiemdar ti excise tax law ken ti Biofuels Act.
Sigun kenni Cong. Domogan, dagiti addang a mabalin nga aramiden ti Kongreso ken Senado ket ti posible a panakasuspendir ken panaka-amyendar ti excise tax law, kasa met ti posible a panakaaramat ti lump sum, discretionary funds, wenno mapastrekan ti PAGCOR ken PCSO kas subsidiya kadagiti maapektaran a sektor.
Kabayatanna, namnamaenna a mapapartak ti panangtalantan ti kongreso iti impilana a gakat a mangkidkiddaw iti panakairamanan dagiti produkto a petrolyo iti Price Act, tapno masulosyunan ti dakkel a deperensiya ti presyo dagiti nasao a produkto iti nagbaean ti siyudad ti Baguio kadagiti dadduma a lugar a kas sadiay La Union.
Kagiddan iti daytoy, madama met ti panang-ad-adal ti opisyal ti panakaipasa ti maysa a gakat a mangipataw iti nadagdagsen a pannusa kadagiti kompanya nga aglaklako kadagiti nababa ti kualidadna nga construction materials ditoy pagilian.//Bombo Alfred Pudsoc
