Impasigurado ni Baguio City Mayor Benjamin Magalong a maipaayan metlaeng dagiti taxi drivers iti tulong pinansyal kagiddan ti agtultuloy a panagngato iti presyo ti produkto a petrolyo.
Iti panakiuman ti Bombo Radyo kenni Mayor Magalong, kinunana a manarimaanen ti panangberipikarda kadagiti naisumitir kadakuada a listaan dagiti taxi drivers a nakarehistro nga agpaspasada iti nagduduma a ruta iti Baguio City.
Kagiddan dayta, impeksa ni Mayor Magalong ti panakasdaawna iti bilang dagiti karaman iti listaan dagiti taxi drivers a dimmanon iti nasurok tallo a ribo, ad-ado nu idilig iti nasurok sangaribo a bilang dagiti public utiliy jeepneys(PUJs) nga immunan a naipaayan iti ayuda.
Sigun iti local chief executive, ad-ado koma dagiti jeep ngem kadagiti taxi iti siudad rason a patienna a dakkel ti problema a kasapulan a marisut iti mobility system ti siudad.
Kwinestyunaranna metlaeng ti Land Transportation Franchising and Regulatory Board (LTFRB) nu apay nga ited dagitoy nga ited ti prangkisa a sigun kenkuana ket saanda nga ikonkonsulta iti lokal a gobyerno.
Kabayatanna, malaksid iti sektor ti transportasyon, impanamnama ni Mayor Magalong a maipaayan metlaeng ti tulong dagiti nakukurapay a residente iti siudad wenno dagiti urban poor.
Iti agdama, kinuna ti mayor a manarimaanen ti panangbukelda iti economic continuity plan tapno masigurado a ma-address dagiti agdama a parikut iti siudad nangruna iti ekonomiya.//Bombo Rob Dominguez
