Agarup 300 a PUV drivers wenno taxi drivers ti nakaawat iti ayuda wenno financial assistance manipud iti City Government.
Sigun kenni alyas “Alfred” maysa nga operator iti siudad ti Baguio a nakaawat ti ayuda, adda pay dagiti sumarsaruno wenno batch a nakaschedule a makaawat iti ayuda.
Kinunana nga agarup 2,400 ti pakabuklan a bulang dagiti drivers a nakalista a makaawat ti nasao nga ayuda iti syudad ti Baguio.
Imbinglay daytoy a dagiti schedule dagiti sumarsaruno a nagan a maikan ket makita iti KOTDA wenno Baguio-Benguet Taxi Groups wenno kadagiti Group Chats iti tunggal grupo tapno saanda mailaw-an a makipila.
Kabayatanna, impeksa daytoy ti panagyamanna iti City Government nu man pay saan a nasurot ti immuna a gatad a naibaga kadakuada gapu ta mamati daytoy a nalabit tapno mawarasan amin dagiti taxi drivers iti siudad isu’t gapunna a nagkissay dagitoy iti gatad.
Iti agdama, dumanon iti nasurok 3,000 a unit ti taxi drivers iti siudad.
Guyguyugoyenna dagiti pada na a drayber a nu adda ti tulong a maipaay ket anusanda laeng nga agiproseso kadagiti papeles.
Innayonna a daytoy pay laeng ti kaunaan a naipaay nga ayuda para kadagiti taxi dribers.
Sigun kenkuana, dimmanon iti uppat a kiddaw ti impatumpalda kadagiti nagduduma nga ahenisya kas iti AICS Program babaen iti Department of Social Welfare and Development, Land Transportation Franchising and Regulatory Board, ken iti Office of the Congressman ngem ti City Government pay laeng ti nakaipaay ti tulong iti agdama.
Kabayatanna, makurangan dagiti dadduma a drivers iti naawat dagitoy gapu iti boundaries a baybayadanda ket ti paggatangda ti kanen dagiti pamilyada.
Nupay kasta, agyamyaman latta dagitoy iti naipaay a gatad .
Dagiti met dadduma, kweskwestionaranda ti nasao a proseso.
Tunggal driver, nakaawat iti P3,000 ket posible a maadaan tupay ti 2nd List inton maikan amin a taxi drivers iti siudad. //Bombo Noveh Organo
