Kinumpirma ti Kamara a naisumitiren iti Bureau of Internal Revenue dagiti income tax returns ni Vice President Sara Duterte ken ti asawana a ni Atty. Carpio.
Naituding a maipresenta ti nasao nga ITR inton bigat, Abril 22, kas agtuloy ti panagdengngeg ti nasao a komite.
Sigun kenni Justice Committee Chairperson Representative Gerville Luistro, saan a napatgan ti petisyon nga impila ni Atty. Carpio idiay Quezon City Regional Trial Court idi Abril 13 a mangkidkiddaw a lapedan ti komite a maala ti ITR daytoy.
Maipalagip a nangipila ni Atty. Carpio ti reklamo kontra iti subpoena ti komite kenni Bureau of Internal Revenue Commissioner Charlie Mendoza tapno iparuwar daytoy iti dokumento ti buwis dagiti agasawan ken kadagiti negosyo dagitoy.
Namnamaen ni Luistro a matalantan kadua ti Bureau of Internal Revenue dagiti limitasyon seknan iti confidentiality dagiti kasapulan a dokumento.
Kabayatanna, inlawlawag ni Luistro a dagiti laeng report manipud iti Anti-Money Laundering Council (AMLC) ti ipaawag ti komite para iti panagdengngeg inton bigat seknan iti alegasyon nga ‘unexplained wealth’ kontra iti bise presidente.
Karaman iti makidkiddaw a dokumento ti covered transactions iti agarup P500,000 a gatad pangato, pakairamanan dagiti dadduma pay a suspicious transactions. //bombokaren.c.s
