Agtultuloy ti panawagan iti grupo iti Pagkakaisa ng mga Samahan ng Tsuper at Opereytor Nationwide (PISTON) para iti pannaka-ikkat iti excise tax ken value added tax (VAT) kadagiti produkto iti petrolio gaputa daytoy ti maysa kadagiti rason iti bassit a pammastrekan iti panagpasadada.
Iti ekslusibo a pannakiuman iti Bombo Radyo Baguio kenni Mody T. Floranda, National Presidente iti PISTON, dakkel ti P15 tunggal litro a kessay para iti kita dagiti drayber. Iti agdama, ti kita iti tunggal drayber ket dumanon laeng iti P300-P400 tungal aldaw.
Kinunana a numan pay adda ti ayuda a nagtaud iti Land Transportation Franchising and Regulatory Board (LTFRB) ken Department of Social Welfare and Development (DSWD) ket minimal laeng dagiti nakaawat iti daytoy.
Numan pay adda dagiti rollback a napasamak kadagiti napalabas a lawas, saan paylaeng a maisubli ti sigud a presio isut gapuna nga agtultuloy ti panagapelada iti gobierno nu sadinno nangipatulodda iti petision para iti kanayunan a plete.
Ur-urayenda paylaeng ti sungbat iti LTFRB iti nasao a petision.
Dinakamat pay ni Floranda nga agtultuloy ti panagtignay iti grupo kadagiti terminal ken merkado publiko tapno ilawlawag kadagiti umili ti dakkel nga epekto iti panagngato iti presio iti petrolio.
Kabayatanna, inyebkasna ti panagyamanna kadagiti komyuter iti rehion Cordillera nangruna iti siudad ti Baguio ti boluntario a panagngato iti plete iti siudad.
Kinunana pay nga iti panawen ti krisis, awan ti dadduma nga agtinnulong nu diket iti tunggal maysa. | via Bombo Khey Reparip
