Impanamnama ti Department of Social Welfare and Development (DSWD) ti panangipaay ti tulong iti pamilya iti maysa a senior citizen a pimmusay sakbay pay a maawatna ti ayuda nga inpilaanna para kadagiti apektado a corn farmers idiay Cagayan gapu iti epekto ti kalgaw.
Nabigbig ti biktima a ni Wilson Corpuz, 67-anyos, ken residente idiay Amulung.
Sigun kenni DSWD Regional Director Lucia Allan, nupay saan daytoy a naala ti P10,125 a tulong pinansyal iti sidung ti Emergency Cash Transfer, tulongan ti nasao nga ahensiya ti pamilya daytoy iti dadduma a pagkasapulan pakairamanan ti pannakaitabon ti nasao a senior citizen.
Sigun iti report, naawanan ti puot ti senior citizen iti ruar ti payout site idiay Kapitolyo idi apan kuma daytoy mangan.
Naitaray pay daytoy iti pagagasan ngem naideklara daytoy a dead on arrival.
Gapu iti napasamak, naikan ti importansya ti panangipaay nga umuna ti ayuda nangnangruna kadagiti senior citizens nga apektado iti kalgaw. //bombokaren.c.sapirao
