Agkidkiddaw ti maseknan nga ahensya ti panag-anus ken pannakaawat ti publiko, nangruna dagiti residente iti manarimaan a konstraksyon ti kalsada sadiay Barangay Hillside, Baguio City.
Sigun kenni Rodel Lagare, Engr. I ti planning division/section iti city engineering office, naitantan ken nailaylayon ti nasao a proyekto gapu kadagiti sumagmamano a karit a napasaran dagitoy.
Iti baet dayta, impanamnamana a malpas ti proyekto iti kabiitan a panawen.
Sinuportaran met daytoy ni Ferdinand Bucad, Kapitan ti Barangay Hillside, Baguio city.
Impeksa daytoy nga ar-aramiden dagiti trabahador ti amin a kabaelanda tapnu mapapartak ti pannakaileppas ti nasao a proyekto.
Innayunna metlaeng nga adu dagiti isyu a nasken a masolusyonan bayat ti panakaimplementar ti proyekto kas iti panagkonsultada kadagiti residente nga apektado ti sanikuda, nangruna ta naadaan ti road widening ken dadduma pay.
Malaksid iti dayta, adu ti magmagna a motorista tunggal weekends iti laksid nga adda dagiti karatula a temporary closed ken one way laeng.
Gapu iti dayta, maurnung ti lugan ken madisturbu metlaeng ti trabaho dagitoy.
Impetteng ni Bucad a dakkel a tulong ti nasao a proyekto gaputa makatulong a mangpabassit iti nailet a gunay ti trapiko.
Impetteng metlaeng ti Brgy.opisyal a kanayun ti inspeksion ken panagsukimat ditoy dagiti maseknan nga ahensya.//Bombo Noveh Organo
