Pimmusay ti 67-anyos a lalake a.k.a. Boyet a pahinante ti truck bayat nga stable metten ti driver ken maysa pay a pahinante a nadisgrasya idiay Circumferential Road Sta. Lucia, KM3 Asin Road, Baguio City agsapa idi kalman.
Sigun iti pannakiuman ti Bombo Newsteam kadagiti otoridad, naideklara a pimmusay ti nasao a pahinante alas-9:14 ti agsapa idi kalman.
Maipalagip a tallo nga indibidual ti naitaray iti ospital kalpasan a maatap a naawanan ti preno ti naglugananda alas-6:55 ti agsapa idi kalman.
Naireport laeng daytoy kadagiti kapulisan pasado alas-syete ti agsapa.
Ti nasao nga insidente ket nakairaman ti maysa nga ISUZU Forward Wing van nga imanmaneho ti 45-anyos a lalaki kaduana dagiti dua pay a pahinante, agpapada a residente ken agkakabagyan manipud Pampanga.
Iti inisyal nga impormasyon a nakalap ti Bombo Newsteam, agideliver kuma dagitoy ti semilya ti repolyo, wombok, ken sili idi napasamak ti insidente.
Sigun kadagiti kakadua dagitoy a nakalugan iti sabali pay a truck, agarup 2,000 trays ti nilaon ti nadisgrasya a truck.
Innayonda pay a nagovertake ti nasao a truck ken nagsignal met daytoy.
Apaman a nakalabas daytoy iti inovertakanna a lugan, nakaangot daytoy iti indikasyon a posible a naawanan ti preno ti nasao a truck a nangitunda metten ti pannakaibanggana iti pader.
Gapu iti daytoy, ‘totally wrecked’ wenno nadadael ti sibubukel a truck.
Kabayatanna, impeksa ni Pcpt. Aldrin Saltin, Station Commander, agarup sangapulo key maysa metten ti napasamak a disgrasya iti nasao a disso. Sigun kenkuana, accident prone area gamin ti nasao a paset ti kalsada.
Agpalpallagip met dagitoy kadagiti amin a motorista nga agannad dagitoy iti panagbyahe da. //Bombo Noveh Organo
