Imbilin ni Baguio City Mayor Benjamin Magalong ti nainget nga inspeksyon iti maysa a restaurant a nagviral iti social media no sadino adda ti nailaok nga otot (rat) iti naorder kadakuada a sinigang na hipon.
Ti nasao a pablaak iti social media, nagviral no sadino makita kadagiti sumagmamano a naimatangan ti Bombo Newsteam nga screenshots manipud ti pananginsalaysay ti poster iti napasamak.
Sigun iti pablaak ti customer, 12:30 agingga 1:30 ti aldaw idi Hunyo 12 idi nagturong dagitoy iti nasao a restaurant.
Nagorder dagitoy iti sinigang na hipon. Sakbay nga agala daytoy iti innapoy, nang-igop pay daytoy umuna iti sabaw.
Apaman a nagsubli daytoy iti lamisaanda ken inkiwarna ti sinigang na hipon, napansin na nga ada ti nangisit a nailaok iti nasao a sabaw.
Gapu ta saan unay a nasayaat ti panagkitana wenno addaan daytoy iti ‘poor eyesight’, kiniddawna kadagiti babarkadana a kitaenda daytoy.
Ditoy metten a kinumpirma dagiti kakakaduana nga otot ti nangisit a nailaok iti orderna.
Malaksid iti dayta, impeksa ti customer iti pablaakna nga awan ti uray maysa kadagiti staff ti inmasideg kadakuada tapno kitaenda ti sitwasyon kalpasan ti panagpukkawda gapu ti nakitada no sadinno kasapulan nga isuda paylaeng iti immasideg kadagiti staff tapnu ibaga ti situation.
Innayon pay ti nasao a customer nga ‘unwilling’ dagiti staffs ti nasao a panganan a mangbigbig iti responsibilidad ken saanda a pinansin dagitoy idi kiniddaw ti nasao a grupo nga umikatda laengen gapu iti trauma a napasaranda.
“This level of negligence and disregard for customer safety and wellbeing is unacceptable…..”, sigun iti pablaak ti nasao a customer.
Kabayatanna, impanamnama ni Mayor Magalong a sumango ti anyaman a pannusa ti makinkukua iti nasao a restaurant kalpasan iti maisayangkat nga imbestigasyon.
Sigun kenni Mayor Magalong, saan dagitoy a basta-basta makasubli iti operasyon agingga a saan daytoy a nakapasa iti sanitation ken dadduma pay.
Iti baet dayta, kinnidawna ti panagtitinnulong ti amin para iti pannakamintinir ti kinadalus nangruna kadagiti amin a food establishments.
Impanamnama na met iti publiko ti pannakasolbar dagiti parikut iti ‘sanitation’.
Kagiddan dayta, nagkiddaw daytoy ti dispensa iti publiko ken kadagiti biktima iti nasao nga insidente.
Iti agdama nakaserra ti nasao a restaurant. // Bombo Noveh Organo
