Ginuyugoy dagiti health advocate dagiti lokal a gobierno a mangipatungpal iti nainget ken komprehensibo a polisia kontra iti tabako, karaman ti panagsigarilio, panagngalngal iti momma, panagaramat iti vape, ken dadduma pay a produkto nga addaan iti nikotina.
Sigun kenni Cecile Agpawa iti Transcend, panggep daytoy a maitunos dagiti agdama nga ordinansa iti pagalagadan iti World Health Organization Framework Convention on Tobacco Control.
Impettengna a kaaduan kadagiti munisipyu iti Benguet ket addaan iti kapada a polisia a kas iti siudad ti Baguio.
Impaganetget ni Agpawa a saan nga umdas iti polisia laeng nu saan daytoy a maawatan ken masurot iti publiko. Kinunana a napateg a mangrugi ti regulasion ken adbokasia iti uneg mismo iti pagtaengan.
Kabayatanna, kinuna met ni Jude Tayaben iti Benguet State University nga adda dagiti ubbing nga agtawen paylaeng ti 10 ti nangrugin nga agaramat iti tabako ken vape, kadawyan a gapu iti impluwensia kadagiti nagannak.
Gapu iti daytoy, itantandudo iti agdama dagiti advocate ti kampania nga “smoke-free home” tapno mapapigsa ti laban kontra iti panagsigarilio ken panagaramat kadagiti produkto nga addaan iti nikotina, nangruna kadagiti agtutubo.
Maramrambakan tunggal Hunio ti National No Smoking Month tapno palawaen ti pannakaamo iti pangta iti tabako ken guyuguyen dagiti agsigsigarilio a sumardeng.
