Imbinglay ni Erron Van Doligan, Bombo International News Correspondent manipud Las Vegas nga agraraita itan idiay ti phone scams iti nasao a pagilian.
Sigun kenni Doligan, nangipatulod metten ti gobyerno iti nasao a pagilian ti mass email a mangbalballaag iti publiko seknan iti false scams.
Imbinglay ni Doligan a kadawyan a biktima ti scams iti nasao a pagilian ket dagiti senior citizens, pasyentem, ken dadduma a paset iti vulnerable sectors no sadinno adda ti umawag kadakuada nga agpammarang kas kameng ti otoridad ken ipakaaammoda nga adda ti kasapulanda a bayadan a gatad.
Sigun kenkuana, addu dagiti mabiktimada gapu ta ipagarupda a pudno a kameng dagitoy iti otoridad.
Innayonna pay a butbutngem dagiti nasao a suspek kadagiti biktimaenda a nu saanda a bayadan a dagos ti nasao a gatad iti naituding nga oras, danunonenda dagitoy kadagiti pagtaenganda ket kemmegenda dagitoy.
Imbinglay ni Doligan a ti nakabutbuteng itan, kabaelan dagiti suspek a maala dagiti personal nga impormasyon dagiti biktima da isunga addu dagiti mamati ken mabikbiktima.
Imbinglayna pay a ti kaunaan a pakabigbigan ti nasao a scam ket ti panangidagadag ti caller iti biktima a dagos daytoy nga agcomply ken ipatulodna a dagos dagiti kasapulanna a bayadan.
Innayonna pay nga iti kaudian a ballaag kadakuada dagiti otoridad, agridamda kadagiti voice phishing babaen iti Articificial Intelligence gapu ta kabaelanda payen itan nga agaramid kadagiti bank accounts babaen iti panangtulad iti boses ti maysa nga indibidual.
Inlawlawag ni Doligan a dakkel a gatad ti maal-ala dagiti suspek babaen iti nasao a scam. Sigun kenkuana, dumanon iti milyon ti maal-alada isu’t gapunna nga umadaddo metten dagiti makipaspaset iti daytoy a klase ti krimen.
Innayonna pay nga apaman a na-convert dagiti naalada a gatad manipud kadagit biktimada iti cryptocurrency, saanen daytoy a mabawi dagiti biktima.
Isu’t gapunna a sigun kenni Doligan, likliklikanda itan ti makipagtransaksyon babaen iti online. Innayonna a pati metlaeng dagiti bangko sadiay ket agbalballaag kadagiti kliyenteda a saan a makipagtransaksyon babaen iti awag ken iprosesoda laengen dagiti bank transactions da babaen iti opisyal nga online application ti nasao a banko wenno personalda nga ilakad dagitoy. //bombokaren.c.sapirao
